امریکی صدر ڈونلڈ ٹرمپ نے سوشل میڈیا پر اپنے ایک بیان میں دعویٰ کیا ہے کہ امریکی میرینز نے ایک ایرانی پرچم بردار بحری جہاز کو اپنی تحویل میں لے لیا ہے۔ ٹرمپ کے مطابق، امریکی بحریہ کے میزائل بردار تباہ کن جہاز 'یو ایس ایس سپروئنس' نے خلیج عمان میں ایرانی جہاز 'توسکا' کو روکنے کی کوشش کی اور اسے رکنے کی وارننگ دی، تاہم عملے کی جانب سے انکار پر امریکی جہاز نے فائرنگ کر کے ایرانی جہاز کے انجن روم کو اڑا دیا اور اسے وہیں روک دیا۔
صدر ٹرمپ نے مزید بتایا کہ اس وقت امریکی میرینز نے جہاز کا مکمل کنٹرول سنبھال لیا ہے اور اس پر موجود سامان کی تلاشی لی جا رہی ہے۔ انہوں نے دعویٰ کیا کہ یہ جہاز پہلے ہی غیر قانونی سرگرمیوں کی وجہ سے امریکی وزارتِ خزانہ کی پابندیوں کی فہرست میں شامل تھا اور یہ امریکی بحری ناکہ بندی کو توڑنے کی کوشش کر رہا تھا۔ اس سنگین واقعے پر ایران کی جانب سے تاحال کوئی باضابطہ ردِعمل سامنے نہیں آیا ہے۔