اردن کی مسلح افواج نے آج صبح سویرے ملک کی حدود میں داخل ہونے والے 5 ایرانی بالسٹک میزائلوں کو فضا میں ہی تباہ کرنے کا دعویٰ کیا ہے۔
تفصیلات کے مطابق، اردن کی مسلح افواج کے ترجمان نے تصدیق کی ہے کہ ان کے فضائی دفاعی نظام نے ایران کی طرف سے آنے والے 5 میزائلوں کا بروقت سراغ لگایا اور انہیں اردنی سرزمین پر گرنے سے پہلے فضا ہی میں کامیابی سے تباہ کر دیا۔ یہ کارروائی ایرانی پاسدارانِ انقلاب کے اس باضابطہ بیان کے فوری بعد سامنے آئی ہے، جس میں ایرانی پاسدارانِ انقلاب کی ایئر فورس نے دعویٰ کیا تھا کہ انہوں نے اردن میں قائم امریکی ملٹری بیس اور سینٹرل کمانڈ سینٹر کو متعدد بالسٹک میزائلوں سے نشانہ بنایا ہے۔
اردن کے دفاعی حکام کا کہنا ہے کہ ملکی حدود کی حفاظت اور شہریوں کی سلامتی کے لیے ایئر ڈیفنس سسٹم کو مکمل ہائی الرٹ پر رکھا گیا ہے اور کسی بھی فضائی خلاف ورزی کا فوری اور مؤثر جواب دیا جا رہا ہے۔ ایران اور خطے میں قائم امریکی عسکری ٹھکانوں کے درمیان بڑھتی ہوئی اس براہِ راست کشیدگی نے مشرقِ وسطیٰ میں سیکیورٹی کی صورتحال کو انتہائی حساس بنا دیا ہے۔