ڈونلڈ ٹرمپ کا بڑا بیان: ایران سے معاہدے میں جلدی نہیں، آبنائے ہرمز کی ناکہ بندی برقرار رہے گی

 

 امریکی صدر ڈونلڈ ٹرمپ نے سوشل میڈیا پلیٹ فارم 'ٹروتھ سوشل' پر جاری اپنے ایک تازہ ترین بیان میں کہا ہے کہ ایران کے ساتھ مذاکرات ایک منظم اور مثبت انداز میں آگے بڑھ رہے ہیں، تاہم انہوں نے اپنے نمائندوں کو ہدایت کی ہے کہ وہ کسی بھی معاہدے کے لیے جلد بازی سے کام نہ لیں کیونکہ اس وقت وقت امریکہ کے حق میں ہے۔ اس سے قبل گزشتہ رات انہوں نے یہ بھی دعویٰ کیا تھا کہ تہران کے ساتھ ایک معاہدے پر "بڑے پیمانے پر مذاکرات" مکمل ہو چکے ہیں۔

صدر ٹرمپ نے واضح طور پر اعلان کیا کہ خلیج کے سب سے اہم بحری راستے 'آبنائے ہرمز' پر امریکی بحریہ کی ناکہ بندی اس وقت تک پوری قوت کے ساتھ برقرار رہے گی جب تک کہ ایران کے ساتھ باقاعدہ معاہدہ طے نہیں پا جاتا، اس کی تصدیق نہیں ہو جاتی اور دونوں ممالک اس پر دستخط نہیں کر دیتے۔ انہوں نے لکھا کہ دونوں فریقین کو پورا وقت لینا چاہیے اور ایک درست معاہدہ کرنا چاہیے کیونکہ اس میں کسی بھی غلطی کی گنجائش نہیں ہے۔ ٹرمپ نے مزید کہا کہ اب ایران کے ساتھ امریکہ کے تعلقات ماضی کے مقابلے میں کہیں زیادہ پیشہ ورانہ اور تعمیری ہوتے جا رہے ہیں۔